CAGAYAN DE ORO CITY – Hangyoon ni Majority Leader Kag. Edgar Cabanlas si City Mayor Rolando ‘Klarex’ Uy nga ipaubos sa state of emergency ang dakbayan.
Kini agi’g pangandam kon walay makab-ot nga maayong kasabutan tali sa isyu sa panubig nga giatubang sa Cagayan de Oro Water District o COWD ug Cagayan de Oro Bulk Water Incorporated o COBI.
Miingon si Cabanlas nga kon magmagahi ang COBI sa pagsanong ug idayon ang pagputol sa panubig,gamiton usab sa city govt ang gahom niini aron proteksyonan ang interes sa katawhan sa dakbayan.
Samtang sa pikas bahin,idangop sa korte ni Kag. James Judith ang nagka-grabe nga suliran tali sa COWD ug COBI pag-abot sa pagsuplay sa panubig sa dakbayan.
Miingon si Judith nga kon dili na mahilot ug magmagahi ang tigdumala sa COBI sa hangyo sa syudad,pangayuan niya kini’g temporary restraining order sa korte samtang gi-rebyo ang kuwestiyonable nga kontrata ngadto sa COWD.
Miingon si Judith nga giluto lang sa kaugalingong mantika sa COBI ang katawhan sa dakbayan kay si Rio Verde gihapon ang tag-iya ug nag-suplay sa panubig nga gisudlan sa Metro Pacific Water Consortium.
Dumduman nga miaging Pebrero ning tuiga,gihinagbo ni Uy ang duha ka panig sa iyang buhatan aron dili una ipatuman ang unang bahad diin gipaboran sa COBI apan subling naningil sa COWD.
