Joeffrey Seirra sulod sa selda
CAGAYAN DE ORO CITY-Kasuhan sa pagbaligya’g gidiling droga sa piskalya ang empleyado sa city hall nga nasikop sa kapolisan diha sa Brgy 7 sa syudad.
Miingon si Carmen Police Station commander Sr/Insp Demver Vergara nga dugay nang gipanid-an sa mga otoridad ang suspek nga si Joeffrey Seirra,40 anyos,minyo ug nagpuyo sa maong lugar.
Gani,anaa sa listahan sa Brgy Anti-Drug Abuse Council o BADAC ang pangalan ni Seirra hinungdan nga gilusad ang operasyon batok kaniya.
Si Seirra kinsa regular city hall employee ang nagdumili mohatag komento sa Bombo Radyo dihang gikuha ang panig niini.
Nakompiskar gikan sa suspek ang upat ka suspected shabu ug marked money nga 2-mil pesos atol sa operasyon sa miaging gabii.
Samtang pagkatangtang sa trabaho ang isilot sa Roads and Traffic Administration batok sa ilang mga miembro nga masapon magbaligya o magamit sa gidiling droga sa syudad.
Gihimo ni RTA operations head Carmelito Deloso ang bahad tungod sa laing miembro nila nga nasapon nga giingong naghithit sa gidiling droga sa Brgy 17 ning syudad.
Gikompirmar ni Deloso nga aktibong empleyado sa RTA ang suspek nga si Nelson Rimontigue Jr,minyo ug taga-Biasong,Brgy Macasandig sa syudad.
Hinoon,dili si Rimontigue ang unang RTA member nga gitangtang sa trabaho apan daghan na ang napriso kay nagbaligya ug paggamit sa gidiling droga sukad pa sa miaging katuigan.
