CAGAYAN DE ORO CITY – Nakasuhan na ang empleyado sa city hall nga unang miangkon nga nanglabni’g celphone sa babayeng pasahero sulod sa passenger jeep sa Brgy Nazareth ning syudad.
Miingon si Macasandig Police Station commander Police Maj Erickson Sabanal nga kasong pagpangawat ang giatubang ni Paul Ampo,hingkog ang panuigon tungod sa paglabni sa celphone nga gipanag-iya ni Juracel Tanio ning syudad.
Dugang ni Sabanal nga nadawat na sa piskalya ang mga dokumento ug tiwason nila ang pagduso sa kaso batok sa suspek sa adlaw’ng Lunes.
Samtang e-rebyo sa komitiba sa police,fire and public safety ang gabayan sa pag-hire sa mga aplikante aron mahimong empleyado sa city hall.
Kini human angkona ni retired army major general ug karong Kag Romeo Calizo nga naghatag kaulawon sa dungog sa syudad ang pagkasikop ni Paul Ampo tungod pagpanglabni’g celphone sa usa ka babaye sa Brgy Nazareth sa miaging adlaw.
Miingon si Calizo nga mangayo kini’g progress report sa kapolisan aron makahimo’g lakang sa konseho kabahin niini.
Si Ampo ang dul-ag tulo ka tuig nang job order diin nagsilbing street sweeper sa syudad.
