CAGAYAN DE ORO CITY-Gipasalig karon sa pipila ka alyadong magbabalaod ni Pangulong Rodrigo Duterte nga dili makalusot ang impeachment case nga giduso ni Magdalo partylist Rep Gary Alejano sa Kongreso.
Kini bisan nga wala pa matuki sa House committee on justice ang mahimong porma ug unod sa reklamo nga gisang-at ni Alejano batok Duterte atol sa ilang subli pagbalik sa sessions sunod bulan.
Gibutyag sa Bombo Radyo ni Cagayan de Oro 2nd District Rep Maxi Rodriguez Jr nga supakon niini ang gihimo ni Alejano.
Hinoon,limitado ang pahayag ni Rodriguez tungod kay wala pa niini mahupti ang kopya sa reklamo ni Alejano kontra Duterte.
Gipasalig sa kongresista nga wala pa siyay nahuptang kopya sa impeachment complaint.
Samtang gibutyag usab ni Cagayan de Oro 1st District Rep Rolando Klarex Uy nga maglisod makalahutay ang pasangil sa Magdalo batok kang Duterte.
Gibutyag usab niini sa Bombo Radyo nga gihulat pa niya ang kopya ayha ihatag ang kaugalingong baruganan niini.
Apan gilauman na nga pugngan ni Uy ang reklamo sanglit kabahin siya sa mga kongresista gikan sa Amihang Mindanao nga mibotar sa kontrobersyal nga balaodnon alayon sa subli pagpatuman sa death penalty sa nasud.
