CAGAYAN DE ORO CITY- Giuyunan ni Citizens Watch for Good Governance o CWGG convenor Atty Antonio Soriano si Muntinlupa City Regional Trial Court Branch 204 Presiding Judge Juanita Guerrero nga pagmando pagpadakop kang Sen Leila de Lima.
Kini tungod sa pasangil sa Dept of Justice nga nalambigit si De Lima sa pagdawat sa minilyong salapi gikan sa convicted druglords sulod sa New Bilibid Prison diin dayag nga kasupakan sa Republic Act 9165.
Gibutyag ni Soriano nga kon may angay basulon sa nahitabo,mismo si De Lima ra gihapon tungod sa wala pagtahod sa proseso sa balaod ilabina ang pagtubag unta niini sa sumbong sa DoJ batok kaniya.
Samtang gisupak sa ilado nga abogado nga si kanhi Cagayan de Oro Lone District congressman Atty Erasmo Damasing Jr ang paagi ni Guerrero sa pagpagawas sa warrant of arrest batok Sen Leila de Lima.
Gibutyag ni Damasing nga daw napihig si De Lima sa iyang katungod nga madungog una ang gisang-at nga petisyon diin nag-kuwestiyon sa gipasaka sa kasong gipasaka sa Dept of Justice batok kaniya sa korte.
Gani,wala usab makaangay si Damasing tungod sa giingong paghatag pabor sa 5 ka convicted druglords sulod sa New Bilibid Prison nga kanhi miduot kang De Lima sa pagpakuyanap sa illegal drug trade sulod sa New Bilibid Prison.
Samtang gipanalipdan ni Senate President Koko Pimentel ang mando sa korte nga sikupon si De Lima bisan may pending mosyon pa kini nga tuyo mahataga’g katin-awan ning adlawa.
Kini human miani sa nagkadaiyang reaksyon ang paagi ni Guerrero sa pagpagawas sa mando nga sikupon si De Lima.
Gibutyag ni Pimentel nga ensakto ug bag-ong legal theory ang gigamit ni Guerrero sa pagpadakop kang De Lima aron moatubang kini sa kaso nga naduso sa iyang sala.
