CAGAYAN DE ORO CITY-Gimanduan ni City Legal Officer Atty Lorela Escobela ang komitiba sa trade and commerce committee sa konseho nga itugyan sa NBI-10 ang pag-imbestigar sa tanang transaction gisudlan sa Freeman Traders Club ning syudad.
Kini human nasuta nga wala pa’y gihuptang mga dokumento nga nagtugot kang Mark Freeman nga mohimo’g transaction sa dugang mga investor niini.
Gihimo ni Escobela ang pahayag nunot sa pag-atubang ni Freeman sa committte hearing tungod sa pipila ka reklamo nga dili na maka-withdraw sa ilang salapi nga nabubo sa crypto currency online investment niini.
Samtang gimanduan ni Security and Exchange Commission regional director Atty Reynato Egypto ang grupo ni Freeman nga ihunong una ang ilang pagpang-recruit sa dugang mga miembro.
Kini samtang wala pa’y kasiguruhan nga mahatagan sila sa permiso sa nagkadaiyang buhatan sa gobierno alayon sa ilang operasyon.
Miingon si Egypto nga dili mahimong mosakay lamang sa kasikat sa ‘bit-coins’ ang grupo ni Freeman aron akapangdani sa ilang mga kliyente.
Una niini,may kasong estafa nga nasaka sa SEC gikan sa duha ka investors batok Freeman ning syudad.
