Gipalig-on sa Office of Civil Defense (OCD) Region 10, City Disaster Risk Reduction and Management Department (CDRRMD), ug uban pang mga ahensya sa Cebu ang koordinasyon aron matubag ang panginahanglan sa mga biktima sa linog nga nahitabo niadtong Septiyembre 30.
Gibutyag ni Janboy Actub, tigpamaba sa opisina ni City Mayor Rolando Klarex Uy nga andam na ang syudad sa paghatag sa dinaliang tabang, lakip na ang mga sleeping materials sama sa mga tents nga gikinahanglan kaayo sa mga apektadong katawhan sa Cebu.
Gipasabot ni Actub nga made-to-order ang maong mga tents ug sigurado nga mapuslan kini sa dugay nga panahon. Kasamtangan nga gikompleto sa lokal nga kagamhanan ang mga ayuda nga ipadala ngadto sa Cebu, lakip na ang mga donasyong personal nga gihatag sa mga empleyado sa city hall pinaagi sa “Tabang Kauban” initiative.
