CAGAYAN DE ORO CITY – Gibutyag karon ni Provincial Gov Bambi Emano nga nangayo na’g tabang sa City Mayor Oscar Moreno sa mga pribadong ospital aron kasudlan sa mga positibong pasyente sa COVID-19 sa syudad.
Kini human unang misulti si Emano nga naglisod na pag-atiman ang syudad sa mga pasyente tungod sa paspas nga pagsaka niini.
Miingon ang gobernador nga subay sa iyang igsoong doktor,mihangyo na ang syudad sa private hospitals nga modawat sa mga pasyente tungod kay puno-puno ang COVID referral hospital -Northern Mindanao Medical Center sa rehiyon.
Samtang wala na tumpangi ni Moreno ang giingong pagpamulitika ni Emano sa COVID-19 response sa syudad.
Miingon si Moreno nga dili kini ang haom ang panahon aron sagulan sa politika ang kahimtang sa katawhan nga nag-antos sa resulta sa pandemya.
Tubag kini sa mayor sa gipakatag nga akusasyon ni Emano nga nangayo’g tabang si Moreno sa pribadong ospital aron dawaton ang mga COVID-19 patients nga dili na ma-akomodar sa covid-referral hospital ning syudad.
Dugtong niini, gitawag sa mayor nga makalolooy ang gobernador kay wala kini masayod sa tukmang aksyon aron pakigbatukan ang bayrus.
