CAGAYAN DE ORO CITY – Nasubo apan miprangka si City Mayor Oscar Moreno sa mga doktor ug ubang propesyonal nga dili niini mahatag ang ilang gipangayo nga mapaubos sa enchance community quarantine ang syudad.
Kini kon bisan gipasabot sa grupo nga gikinahanglan na ang maong lakang ilabina nga may positibong kaso na sa coronavirus disease o COVID-19 ang dakbayan.
Miingon si Moreno nga nalipay siya sa pagpakabana sa CdeO People’s Forum apan mas gihatagan niya’g gimbug-aton ang ubang konsiderasyon nga dili magkalisod pagsamot ang katawhan kon ipaubos na sa lockdown ang dakbayan.
Gihimo ni Moreno ang komento dungan sa paghimo niya’g letter reply ngadto sa CdeO People’s Forum nga mihangyo sa enhanced community quarantine.
Samtang dili kagaw sa politika ang nagtukmod sa grupong CdeO People’s Forum kon nganong gihangyo nila si Moreno nga ipaubos sa enhanced community quarantine ang syudad.
Kini human akusahi sa political supporters ni Moreno ang maong grupo nga nagpagamit sa mga politiko nga kontra sa liderato sa syudad.
Miingon si Navarro nga kon politika pa ang motibo sa maong katuyuan,numero kini nga dili mokuyog sa maong pakigbisog.
Namugos si Navarro nga kuyog ang Kagay-anons ug ubang sektor sa katilingban,angay nga buhaton na kini ni Moreno samtang wala pa mo-grabe ang kaso sa bayrus sa syudad.
