CAGAYAN DE ORO CITY – Misaka na sa walo ang natala nga confirmed cases sa coronavirus disease 19 sa syudad.
Kini dihang nagpositibo sa bayrus ang 19 anyos nga babaye nga taga Pinikitan, Brgy Camaman-an kinsa apo ni PH6783 o ang 69 anyos nga lalaki nga namatay niadtong Abril 18, 2020.
Gibutyag ni Dr. Joselito Retuya, epidemiologist sa City Health Office nga daan nanga gi-kwarantinas ang mga paryente ni PH6783 sa mga City Isolation Unit.
Dugang niini nga kaduha nga gipaubos sa swab test ang duha ka apo sa pasyente ug bag-o lamang nigawas ang resulta nga nagpositibo kini sa virus.
Dugtong niini, nahimo nang walo ang natalang positibo sa covid-19 sa siyudad diin upat niini ang namatay.
Samtang gitin-aw ni Northern Mindanao Medical Center o NMMC media bureau representative Dr Bernard Rocha nga 76 ka health workers sa ospital ang nag-negatibo sa Covid-19.
Kini sukwahi sa unang report nga anaa lamang sa 75 ka mga health workers nga adunay close contact sa Covid-19 patients ang nag-negatibo sa bayrus.
Sumala ni Rocha nga kabahin usab sa nag-negatibo sa swab test ang lead surgeon sa NMMC nga maoy nag-opera sa 21-anyos nga Covid-19 patient human malambigit sa vehicular accident sa may Brgy Lumbia ning syudad.
Una nang gibutyag sa DoH-10 nga anaa sa 113 ka mga medical workers ang gipaubos sa quarantine human makahalubilo sa Covid-19 patients.
