CAGAYAN DE ORO CITY – Gibasura sa Court of Appeals o CA 12th Division ang 24 ka kasong administratibo batok kang City Mayor Oscar Moreno ning syudad.
Kini human unang mi-reklamo si Engr Antonio Nuñez sa Ombudsman kabahin sa walay public bidding nga pag-renta sa heavy equipment sa pagsilbing goberdnaro ni Moreno sa Misamis Oriental.
Miingon si Moreno nga gikalipay niini ang hukom sa CA diin gipaboran ang ilang argumento ug gibasura ang findings nga nag-konbikto kaniya sa maong mga kaso.
Mismo sila si CA Associate Justices Victoria Isabel Paredes,Marlene Gonzalez- Sison ug Maria Elisa Simpio Diy ang milugwa sa 33 ka pahina nga hukom aron mabasura ang 24 ka kasong administratibo batok Moreno.
Samtang nakaginhawa usab ang kanhi members sa Bids and Awards Committee o BAC ni Moreno nga kabahin sa gisumbong sa Ombudsman.
Kini human ibasura usab ang kasong administratibo batok kanila ni Kag Elsie Lopoy, Engr. Rolando Pacuribot, Elmer Wabe, Leemar Tinagan, Divina Bade ug Patrick Gabutina kinsa mga empleyado ni Moreno panahon nga kini misilbi isip gobernador sa Misamis Oriental.
Nalatid sa desisyon sa CA ang kapakyasan sa Office of the Ombudsman nga mapalig-on ang kasong illegal dismissal,disqualification from public service, serious dishonesty,grave misconduct ug conduct prejudicial to the best interest of public service tungod sa pag-renta sa kapitolyo probinsyal sa heavy equipments nga wala miagi sa public biddings.
Unod sa CA decision ang pagbutyag nga walay makitang panagkunsabo sa kampo ni Moreno ug uban pa.
Nakita usab sa CA nga dili lig-on ang mga ebidensya aron idoot sa Moreno sa iyang 24 ka mga kaso.
Namugos ang CA nga dili guilty si Moreno sa gi-akusar nga mga kaso, base sa mga gipresentar nga mga ebidensya sa Ombudsman.
Samtang wala pa makadawat sa kopya sa CA ruling si Nuñez kinsa complainant sa 24 ka kaso batok Moreno.
Namahayag si Nuñez nga naka-out of town kini karon ug wala pa siya’y nadunggan sa susamang ruling sa korte.
Miangkon si Nuñez nga respetuhan niya ang desisyon sa CA ug wala una na mihatag pa sa iyang dugang mga plano sa mga kasong iyang gisang-at batok Moreno.
