CAGAYAN DE ORO CITY – Dili angay balibaran ug yam-iran ang pagpauli sa overseas Filipino workers o OFWs nga unang apektado ang panarbaho didto sa abroad.
Kini human unang gimando ni Pres Rodrigo Duterte sa nagkadaiyang ahensiya sa gobierno nga tabangan mapadali ang pag-uli sa OFWs nga stranded sa kauluhan epekto sa coronavirus disease.
Gihimo ni City Mayor Oscar Moreno ang pahayag isip paghupay sa kabalaka sa OFWs nga taga-Northern Mindanao nga dili sila dawaton sa katawhan ilabina sa syudad tungod sa bahad sa bayrus.
Miingon si Moreno nga wala sa iyang palisya nga dili dawaton ang OFWs ilabina nga dako sila’g natabang sa ekonomiya sa nasud.
Samtang sa pikas bahin,gitahod ni City Mayor Oscar Moreno ang baruganan ni Pres Rodrigo Duterte kabahin sa ‘no vaccine,no school opening’ sa nasud.
Kini human unang gibutya ni Duterte nga dili niya tugtan ang kabataan nga makabalik sa pagtungha kon walay bakuna nga pangontra sa coronavirus disease.
Miingon si Moreno nga nasabtan niya ang gibati nga kahingawa sa presidente alang sa kaugmaon sa kabataan.
Una nang gibutyag ni Moreno nga dili siya uyon nga maputol ang pagtoon sa kabataan tungod lamang sa bahad sa bayrus.
