CAGAYAN DE ORO CITY – Nanganti si City Mayor Oscar Moreno nga manubag ang usa ka private practitioner doktor nga unang miakusar nga sayop ang data nga gipagawas sa Dept of Health o DoH kabahin sa ihap sa mga tawo nga positibo sa coronavirus disease sa syudad.
Kini human angkona nga natandog ang iyang emosyon gumikan sa gipanulti ni Dr Franco Godito nga daw dili ensakto ang gipanulti ni Moreno ug ubang panelists sa matag-prescon kabahin sa update sa pakigbatok sa bayrus sa dakbayan.
Miingon si Moreno nga dili niya palabyon ang gihimo ni Godito kay giingong makapila na niini gihimo ang pagguba sa kredibilidad sa syudad samtang gipaningkamutan mapugngan ang bayrus.
Samtang gitambagan sa grupong Luwas Kagay-anon si City Mayor Oscar Moreno nga tuhugon pag-ayo ang impormasyon ayha mopakita’g emosyonal nga reaksyon atubangan sa publiko.
Kini human unang nakadawat si Moreno sa tawag gikan sa iyang alyado nga gidaut sa usa ka doktor ang paningkamot batok COVID-9 sa syudad.
Miingon si Luwas Kagay-anon convenor Atty Mart Maandig wala dauta apan gisuportahan ni Dr Franco Godito ang ubang paningkamot sa syudad kontra sa pandemya.
Gihimo ni Maandig ang pagpasabot kay nagtoo si Moreno nga nagtinguha ang grupo nga gub-on siya alang sa politikanhon nila nga katuyuan.
