CAGAYAN DE ORO CITY – Dili ‘fall guy’ ang nadakpan sa hiniusang operasyon sa kapolisan nga kanhi sakop sa CPP-NPA sparu unit nga may kalabutan sa kamatayon ni late Carmen Brgy Kag Roland Sherwin ‘Tawee’ Uy sa Brgy Pagatpat ning syudad sa miaging Nobyembre 2021.
Kini ang pag-depensa sa mayor ngadto sa kapolisan nunot sa pagduda sa pipila ka tawo sa pagkasikop sa akusado nga si Edgardo Gaabucayan sa lungsod sa Lala,Lanao del Norte sa miaging semana.
Gihimo ni Mayor Rolando ‘Klarex’ Uy ang katin-awan batok sa gipamugos sa pipila ka social media reactors nga gidakop sa PNP si Gaabucayan aron lang dunay ma-presentar kaniya isip accomplishment.
Siya miingon nga sukad sa pagsugod sa pag-imbestigar sa kamatayon ni Kag Tawee ug caretaker niini nga si Samuel Pabalan,susama nga impormasyon ug hitsura sa personalidad ang gi-presentar sa kapolisan ngadto sa iyang pamilya.
Samtang dili magpanuko si Uy paghatag sa natigom nga 12 milyones pesos nga reward money ngadto sa giingong testigo nga nakatabang sa kapolisan aron masikop ang akusado sa Kag Tawee-Pabalan double murder case ning syudad.
Kasiguruhan kini sa mayor bisan kon may pipila ka mi-kuwestiyon sa ‘legitimacy’ sa pagka-sikop sa akusado nga si Gaabucayan sa maong kremin.
Gibutyag ni Mayor Klarex nga barugan niya ang saad sa ilang pamilya kabahin sa paghatag sa cash reward alang sa ikadali’g sulbad sa kamatayon sa iyang anak.
Sa pikas bahin,giklaro sa SITG-Uy nga pabiling gawasnon man ang mismong akusado nga mipatay kang ‘Tawee’ sulod sa ilang kuwarehan sa Brgy Pagatpat ning syudad.
Gibutyag ni Bulua Police Station commander Maj Jerson Estanilla nga ang ilang nadakpan nga si Gaabucayan ang akusado sa pagpusil kang Pabalan ug dili kang Tawee.
Siya miingon nga gisalikway usab nila ang motibo sa politika apan pagdumot tungod sa isyu sa kuware ang gitutukan nila nga motibo sa maong kremin.
