CAGAYAN DE ORO CITY – Dismayado si City Mayor Oscar Moreno sa liderato sa konseho human pakyas mapasar ang ordinansa sa landbanking o paghupot sa dugang luna sa yuta sa syudad.
Kini human unang gi-desensyo ni Moreno nga makabaton sa laing mga yuta aron magamit nga kabalhinan sa libuang pamilya nga walay kaugalingong katukuran sa mga pinuy-anan sa syudad.
Miingon si Moreno nga diritso unta kini nga gisultihan sa konseho kon ugaling may mga kalibog ug pagkuwestiyon aron mahatagan sa ensakto nga pagpasabot.
Una niini,anaa sa upat ka konsehal sa syudad ang nagpadayag pagsupak nga ma-aprobahan ang proposed ordinance alang sa maong katuyuan.
Samtang gihupay ni City Vice Mayor Rainer Joaquin ‘Kikang’ Uy ang pagmahay ug kadismayado ni Moreno sa city council.
Kini human gibutyag ni Uy nga mahimo pang subli matuki ang ordinansa nga gusto ni Moreno mapalabang aron makapalit sa dugang yuta nga magamit sa informal settlers sa syudad.
Miingon si Uy nga dili suliran kanila ang pagtuki’g balik sa maong sugyot balaodnon ilabina kon mapasabot kini’g maayo ni Moreno sa mga konsehal nga kusganong nagsupak niini sa katapusang sesyon sa city council.
