CAGAYAN DE ORO CITY – Gimanduan ni City Mayor Oscar Moreno ang Cagayan de Oro City Police Office o COCPO nga makigkoordinar sa cybercrime division aron masubay ang Facebook account nga nag-post sa sayop nga impormasyon kalabot na sa coronavirus disease related cases sa syudad.
Kini may kalabutan sa private message nga gi-post diin ang “suspected severe acute respiratory illness patient” gi-alisdan sa “suspected Covid patient.”
Siya miingon nga gumikan sa nasinatian sa syudad, nagkinahanglan ang lokal nga kagamhanan sa tinood, komprehensibo ug paspas nga impormasyon nga angayang masayran sa publiko sa pakigbatok sa Covid-19 threat.
Samtang gipatawag sa mga opisyal ang pipila ka residente nga nagpakatag sa fake news sa social media diin nagbutyag nga may positibo sa COVID-19 sa Brgy Bayabas sa syudad.
Gibutyag ni Bayabas Brgy Kapitan Eddie Abrogar nga ilang gilekturan ang wala na panganling responsable sa dili maayong gibuhat niini.
Gitin-aw ni Abrogar ga walay kamatuoran nga may positibo nga makamatay nga bayrus sa ilang lugar ug gibuhian ra usab ang maong responsable.
