CAGAYAN DE ORO CITY – Gimanduan ni City Mayor Oscar Moreno ang mga hingtungdang ahensiya nga ipadayon ang pagsusi sa mga tag-as nga gambalay sa syudad.
Kini nunot na sa 6.6 magnitude nga linog nga mitay-og sa Tulunan,North Cotabaton diin nasinatian ang intensity 4 sa syudad sa miaging adlaw.
Si Moreno miingon nga dako ang iyang pagpasalamat tungod kay wala kaayo maapektuhi ang dakbayan sa maong pagtay-og.
Padayon ang panawagan sa alkalde nga gilayong i-report kon ugaling may makita nga dagkong crack sulod sa panimalay o opisina tungod sa maong linog.
Samtang gikompirmar ni City Engineering Office head Engr Roland Pacuribot nga adunay duha ka pampublikong tunghaan sa syudad ang naapektuan sa intensity 4 nga linog nga mitay-og
sa syudad.
Sa ilang gihimong assessment, gidid-an una ni Pacuribot nga ipaggamit ang pipila ka nga lawak saringan sa Lapasan National High School ug Bugo National High School nga nakitaan sa dagkong liki.
Nabalaka si Pacuribot nga mosamot kadako ang crack kon ugaling makasinati sa aftershocks ang syudad.
Samtang gitin-aw ni Office of the Building o OBO head Engr. Isidro Obligado nga wala nay angayang kabalak-an sulod sa call center company nga Teleperformance diha sa Centrio Mall ning syudad.
Kini taliwala sa mga nangabuang nga salamin ug tiles sulod sa maong kompaniya dihang gitay-og sa intensity 4 ang syudad.
Miingon si Oligado nga nagpabiling lig-on ang pundasyon, slub, column ug beam structure hinungdan nga walay angayang kabalak-an.
Gani, gitin-aw usab ni Obligado nga wala sila’y nakita nga major crack sulod sa Centrio-Ayala Mall.
Una nang nag-shutdown sa miaging adlaw ang Ayala human maapektuhan sa linog.
