CAGAYAN DE ORO CITY – Gitahasan ni City Mayor Oscar Moreno ang kapolisan nga hatagan siya’g kumpleto nga report kabahin sa giingong pagkasikop sa suspek sa pagpatay sa traffic enforcer nga si Mark Langam IV.
Kini human unang gipamugos sa kapolisan nga nasikop ang suspek sa kamatayon ni Langam nga gitakdang ilubong na ning adlawa.
Namahayag si City administrator Teddy Sabugaa nga dili una mohatag sa dugang komento si Moreno kay gusto niini ang klaro nga report gikan sa kapolisan kabahin sa hitabo.
Una usab niini,bisan si City Councilor Romeo Calizo ang dili kumbinsido sa pagkasikop sa suspek rason nga gusto niya nga lapdan pa ang pag-imbestigar.
Samtang ipatawag sa kamarabaha si DILG Sec Eduardo Ano kabahin sa gipatuman niini nga memorandum circular 2020-036 sa sunod semana.
Kini aron malamdagan nga dakong ilegal ang maong mando diin nagdili sa mga pribadong tricab ug pedicabs nga makaagi sa national highways sa nasud.
Namahayag si Cagayan de Oro 2nd District Rep Rufus Rodriguez nga angayang iklaro ni Anio nga kadto lamang tricabs ug pedicabs nga mohimo’g pagpamasayro ang angayang did-an ug dili apilon ang gigamit sa pribado.
Kuyog usab ang kongresista sa singgit sa katawhan nga angay mahatagan sa hustisya ang kamatayon ni Langam nga gipatay tungod sa pagtuman lamang sa mando sa DILG sa road clearing operations.
