CAGAYAN DE ORO CITY – Nawad-an na’g paglaum si kanhi Brgy Taglimao Kapitan William Guillani nga maangkon ang hustisya sa iyang mga kaso nga giduso batok City Mayor Oscar Moreno.
Kini human unang gidungog sa Office of the President ang reklamo ni Guillani batok Moreno kabahin sa balor 79 milyon pesos nga cash advance niadtong tuig 2015.
Gihimo ni Guillani ang dismayadong pahayag human sila hatagi’g pila ka adlaw aron moduso sa ilang tagsa-tagsa ka reply memorandum.
Namugos si Guillani nga kuwestiyonabli ang cash advance kay nakapangalan ug mismo ra usab si Moreno ang mipirma sa mga tseke diin gikan sa intelligence fund ang pondo niini.
Samtang walay illegal sa gihimong cash advance ni Moreno sa kantidad 79 milyon pesos nga pondo gikan sa iyang intelligence funds ning syudad sa tuig 2015.
Namahayag ang chief legal counsel ni Moreno nga si Atty Brian Dale Mordeno nga gitugot sa balaod ang maong lakang ubos sa pagsusi sa Commission on Audit o COA.
Kumpiyansa sila nga hingpit ra gihapon nga ibasura sa Office of the President ang reklamo nga giduso ni Guillani batok Moreno.
Matud ni Mordeno nga gituki na usab kini sa COA apan walay nakita nga kasaypanan.
