CAGAYAN DE ORO CITY – Gi-aktibo na City Mayor Oscar Moreno ang Incident Mangement Team o IMT aron masiguro nga magiyahan ang tanang ahensiya sa gobierno nga motutok sa pagbalaan sa semana santa.
Kini tungod sa pagdagsa sa katawhan sa mga simbahan,terminals,pantalan,religious sites sama sa Berhin sa Guadalupe sa Brgy Tablon ug bukid sa Malasag sa Brgy Cugman sa syudad sugod ning adlawa.
Miingon si City Disaster Risk and Reduction Management Dept o CDRRMD officer-in- charge Nick Jabagat nga nakakatag ang ilang mga personahe sa maong mga lugar kuyog ang PNP ug militar aron masiguro nga dili mabalda ang mga pamalandong sa katawhan ning semanaha.
Samtang giisa na usab ni Gov Bambi Emano ang code blue alert alayon sa pagdagsa sa katawhan sa religious sites nga dagsaan sa semana santa sa lalawigan.
Kini sa tuyo nga makab-ot ang ‘zero casualty’ samtang namalandong ang publiko sa pagpasakit ni Kristo ning semanaha.
Miingon si Provincial Disaster Risk Reduction and Management Office o PDRRMO head Fernando Dy Jr nga matapos ang taas nga alerto sa probinsya sa pagsaulog sa Domingo sa pagkabanhaw diin dagsa ang katawhan sa beach resorts sa lalawigan.
Sama usab sa syudad,gipaaktibo usab sa PDRRMO ang Incident Management System o IMS diin dakong puwersa ang makatutok sa Divine Mercy Shrine sa El Salvador City ug Sipaka Heights sa Talisayan ning lalawigan.
