CAGAYAN DE ORO CITY – Nanganti si City Mayor Oscar Moreno nga dili palabyon sa task force ang pagguba sa mga istraktura nga nagtindog sa pipila ka kadalanan diha sa provincial capitol.
Miingon si Moreno angayang mangunsulta si Gov Bambi Emano sa mga abogado aron magiyahan sa ensaktong balaod kabahin sa maong isyu.
Namugos si Moreno nga dili pagpanghilabot ang himoon sa syudad apan klaro nga pagpatuman lamang sa balaod ug sugo ni Pres Rodrigo Duterte.
Samtang gihagit ni Emano si Moreno nga mas unahon ang pagsulbad sa nagkadaiyang suliran sa syudad ug dili manginlabot sa kalihukan sa kapitolyo probinsyal.
Gihimo ni Emano ang pahayag tungod sa laraw sa task force composite demolition nga bungkagon ang mga ilegal nga istraktura nga nakababag sa pipila ka kadalanan sa capitol compound.
Partikular nga gitumbok sa gobernador ang kahu-ot sa trapiko diin nakaapektar pag-ayo sa katawhan ilabina gikan sa lalawigan ug ubang lugar sa Mindanao.
