CAGAYAN DE ORO CITY – Nangayo’g tabang si City Mayor Oscar Moreno sa 4th Infantry Diamond Division, Philippine Army aron magsilbing relibo sa mga pulis nga nagbantay sa mga quarantine checkpoints.
Kini sa tinguha nga makapahulay ang mga nagbantay sa checkpoints ilabina nga limitado lamang ang ihap sa kapolisan.
Gibutyag ni Moreno nga anaa lamang sa 1,150 ka mga pulis ang nagbantay sa mga checkpoints, curfew, social distancing ingon man sa mga nagpahigayon sa operasyon sa tibook syudad.
Nagpasalamat si Moreno kang 4th ID commanding officer Maj Gen Franco Nemesio Gacal sa suporta nga gihatag niini aron maseguro ang kahusay ug kalinaw samtang gipaubos sa community quarantine ang dakbayan.
