CAGAYAN DE ORO CITY – Gipangunayan ni City Mayor Rolando ‘Klarex’ Uy ang pagsusi kuyog ang kapolisan ug pipila ka konsehal ang mga nagbukas bar palibot sa dakbayan.
Kini aron akto nga masaksihan sa mayor ang pisikal nga kahimtang sa seguridad sa mga imnanan sa syudad.
Gihimo ni Uy ang occular inspection human ang natigayong pagsinumbagay sa duha ka grupo sa kalalakin-an sulod sa The Warehouse bar diin nag-resulta sa pagpamusil-patay sa market vendor sa dihang tagsa-tagsa na nga nanguli sa miaging kadlawon.
Miingon si Mayor Klarex nga gipasidan-an niya ang kapolisan nga dili na niini gusto masubli pa ang susama nga hitabo ubos sa iyang administrasyon.
Samtang dako ang posibilidad nga mabalik ang pagpatuman sa curfew hours sa mga kalihukan sa matag-gabii dinhi sa dakbayan.
Kini human pormal nga gihangyo ni City Police Director Col Aaron Mandia si Uy nga ipatuman pagbalik ang maong security measure aron ma-kontrol ang kalihukan sa pipila ka tawo nga hilig mogawas aron maglulinghayaw sa kada-gabii.
Gibutyag ni COCPO deputy director for operations Lt Col Surki Sereñas nga pangayu-on nila ang pagtugot sa mayor aron mapabalik ang limitado nga panglihuk-lihok sa pipila ka indibidwal sa dakbayan.
Nagsumikad ang sugyot nunot sa sunod-sunod nga kremin sa dakbayan diin labing ulahi ang pagpusil-patay night life goer nga si Avelino Majorenos sa syudad.
Sa pikas bahin,kalikayan unta ang pagkahunisi sa kinabuhi sa night life goer kon wala na niini du-uli’g balik ug gisumbag ang naka-engkuwentro sulod sa The WareHouse bar sa Corrales Avenue ning syudad.
Kini ang nasuta sa mga imbestigador subay sa mga nakasaksi ug kuha nga footages sa CCTV camera tungod sa DTI- 10 office sa miaging kadlawon.
Gibutyag ni Cogon Police Station deputy commander Lt Arliegh Cardinal nga pauli na ang grupo sa mga suspek sakay sa pick-up vehicle sa dihang gidu-ulan ni Majorenos ug subli gisumbag ang iyang unang gikabahug-bahog sa kinomo sulod sa bar.
Gilayong mibalos ang sala mailang suspek apan dili mga kinomo ang gisumbalik apan duha ka bala sa kalibre 45 nga armas hinungdang sa kamatayon sa biktima.
Sa pagkutlo ning balita,nahuptan na sa mga imbestigador ang mga impormasyon nga maghatag giya aron madakpan ang grupo sa mga suspek nga gikasumbay sa biktima.
Nunot niini,ipatawag ni Regulatory Complaint Board chairman Atty Edgardo ‘Egay’ Uy ang tanang tag-iya sa bars o balay-kalingawan dinhi sa dakbayan.
Kini aron masuta kon gisunod pa ba sa bar owners ang mga kamanduan sa dakbayan sa pag-operate sa ilang mga patigayon.
Miingon si Uy nga dili sila magpanuko pagsilot sa pipila ka negosyante nga nag-operate sa bars kon masuta nga dunay pagpasagad sa ilang mga obligasyon.
Hisayrang sa wala pa nahitabo ang pagpamusil-patay kang Majorenos,may hitabo na nga nagkasumbagay ang bodyguards sa usa ka bise-mayor nga taga-Lanao del Sur ug ang crimonology student sulod sa Pulse diha sa Divisoria ning syudad sa miaging Domingo sa kadlawon.
