CAGAYAN DE ORO CITY – Nasakitan pag-ayo si City Mayor Oscar Moreno ang pagpanaw ni City Police Director Police Colonel Nelson Aganon.
Sumala ni Moreno nga dakong kawad-on sa syudad ni Aganon ilabina nga namintinar niini ang kahapsay ug kalinaw sa dakbayan.
Si Moreno miingon nga nawad-an siya’g maayo nga opisyal ug higala tungod sa kamatayon ni Aganon.
Una nang gibutyag ni Moreno nga iyang gimonitor ang kalambuan sa kahimtang ni Aganon sulod sa intensive care unit sa
ospital diin naghatag pa’g financial assistance ang lokal nga kagamhanan ngadto kaniya.
Samtang giitin-aw ni Moreno nga mas maayo nga ang Police Regional Office o PRO-10 maoy magpili sa bag-ong City Police Director sa syudad hulip kang Aganon.
Si Moreno miingon nga wala siya’y supak kon kinsa man ang e-rekomendar ni PRO-10 regional director Police Brig Gen Rafael Santiago nga maoy mangulo sa pagdumala sa kalinaw sa dakbayan.
Gani, gibutyag ni Moreno nga gusto niya nga maayo ang relasyon sa PRO-10 sa bag-ong city police director aron matabangan kini kun ugaling adunay dakong problema nga masinatian sa syudad.
