CAGAYAN DE ORO CITY – Giaghat ni City Mayor Oscar Moreno ang babayeng reklamante nga ipadayon ang iyang reklamo batok kang SK Federation President Kag John Michael Seno.
Kini kon dunay basehan ang reklamo niini nga gidangop niya sa city council ug sa laing pa nga proper forum aron mahatagan siya sa gipangita niini nga hustisya kon tinood nga naabusuhan siya.
Apan gitambagan ni Moreno ang biktima nga wad-on usab niini ang mga gi-post sa social media nga sobra ka mga seksi nga hulagway sama sa pagsul-ob sa swimsuit.
Giklaro sa mayor nga wala siya’y gipaboran sa biktima kinsa city scholar sa syudad ug kang Seno nga alyado niya sa konseho.
Samtang pursigido ang biktima nga si alyas Ivy nga pangitaa’g hustisya ang gihimo ni Seno batok kaniya.
Kini human nagka-atubang ang duruha sa unang hugna sa imbistigasyon sa konseho kagahapong adlawa.
Miingon si alyas Ivy nga kini ang rason nga nagpakita siya sa publiko aron dad-on ang iyang reklamo batok sa maong opisyal.
Una nnng giakusar sa biktima nga gipadad-an siya’g mga law-ay nga mensahe ni Seno pinaagi sa Facebook nga nakapatandog sa iyang katungod isip babaye.
Una usab niini,gibutyag sa iyang amahan nga si Emir Virtudazo nga dili nila sibugan ang ilang nasugdan nga pagreklamo bisan kon may dako pa nga impluwensiya si Seno dinhi sa dakbayan
