CAGAYAN DE ORO CITY – Gitambagan ni City Mayor Oscar Moreno ang provincial govt nga hataga’g prioridad ang pag-atiman sa locally stranded individuals ug returning of Filipinos aron dili mosamot pagsaka ang coronavirus sa Misamis Oriental.
Kini imbis nga e-pursige ni Gov Bambi Emano nga pangayuon sa national IATF ang pagtugot nga ipaubos ang lalawigan sa general community quarantine.
Gihimo sa mayor ang komento nunot usab sa pagtoon sa health experts sa usa ka unibersidad sa kauluhan diin kabahin ang Misamis Oriental nga naglakip sa dakbayan nga dunay taas nga kaso sa COVID-19 sa tibuok nasud.
Samtang naniguro lamang si Emano nga pugngan ang pagsaka pa sa positibong kaso sa COVID-19 sa Misamis Oriental.
Kini human iyang nakit-an nga lu-ag ra ang health security protocols nga gipatuman sa dakbayan.
Miingon si Emano nga wala sila sukad nagpagsagad sa pag-atiman sa nangabot nga LSIs ug RoF sa lalawigan sukwahi sa gisulti ni City Mayor Oscar Moreno.
Kini ang rason nga nangahas sila pagsulat sa IATF nga giagi sa regional level aron ibalik sa general community quarantine ang lalawigan nga may 209 na ka kaso sa bayrus nga naglakip sa local transmission nga miigo na sa napulo ka lungsod.
Samtang wala sa hurisdiksyon sa gobernador nga mangunay pag-rekomendar nga ipaubos sa general community quarantine o GCQ ang usa ka lungsod o syudad apan mismo sa local chief executive o mayor.
Kini ang opinyon o pagsabot ni DILG 10 regional director Arnel Agabe aron mahatag sa usa ka munisipyo o dakbayan ang pagpasaka o pagpaubos sa quarantine status niini batok sa coronavirus disease.
Gihimo sa opisyal ang pahayag nunot sa resolusyon ni Emano sa IATF nga ibalik sa istrikto nga pagbantay ang lalawigan kontra bayrus.
Dugtong niini,gihupay ni DoH 10 asst regional director David Mendoza ang kabalaka sa publiko tungod sa taas nga kaso sa local transmission sa COVID-19 sa syudad ug lalawigan.
Miingon si Mendoza nga makontrol pa ang pagkuyanap sa bayrus kon sundon lamang ang mga gabayan nga gitaha sa gobierno sa katawhan.
Gihimo sa doktor ang iyang komento tungod sa taas nga ihap sa mga tawo nga natakbuyan sa sa Cagayan de Oro sa Misamis Oriental diin naglakip niini ang mga kaso sa local transmission.
