CAGAYAN DE ORO CITY-Gisilotan sa laing pagkatangtang sa iyang trabaho si City Mayor Oscar Moreno didto sa Ombudsman.Kini human nakit-ang guilty sa unom ka counts sa pagsupak sa section 3 sa Anti-Graft and Corrupt Practices Act samtang gobernador pa sa Misamis Oriental.
Si Moreno miingon nga iyang pagka-dismiss sa trabaho ang resulta sa paglakag ni Misamis Oriental Gov Bambi Emano bato kaniya.
Gibutyag ni Moreno nga wala siya patubaga sa findings sa Commission on Audit diin unang gi-kuwestiyon ang pag-renta nila sa heavy equipment nga wala gia-gi sa public bidding.
Gawas kang Moreno,tangtang ug kasuhan usab sa Sandiganbayan sila si Patrick Gabutina, Elsie Lopoy, Rolando Pacuribot, Divina Bade, Cancio Guibone, Leemar Tinagan ug Elmer Wabe nga miembro kaniadto sa bids and awards committee o BAC sa lalawigan.
Samtang gikataw-an ni Misamis Oriental Gov Bambi Emano ang pasangil ni Moreno nga iyang mani-obra ang pagtangtang niini sa Ombudsman.
Gibutyag ni Emano nga angay pangutan-on ni Moreno ang iyang mga kauban sa politika kon kinsa ang naghingusog sa maong kaso aron hingpit kining malagpot sa puwesto.
Namugos si Emano nga giantos sa katawhan sa probinsya ang pagbayad sa binilyong utang nga gibiyaan ni Moreno hinungdang imposible siya ang nagtinguha pagpalangkat kaniya sa trabaho.
