CAGAYAN DE ORO CITY-Supak si City Mayor Oscar Moreno sa hangyo ni Pres Rodrigo Duterte sa Kongreso nga subling buhion ang death penalty batok sa drug-related heinous crimes ingon man sa kasong plunder.
Apan gitin-aw ni Moreno nga bisan supak siya sa silot-kamatayon, wala siya’y mahimo kon mao kini ang aprobahan sa Kongreso.Nanawagan na lamang ang mayor sa syudad nga seguradohon nga maoy masilotan sa kamatayon kadtong tinood nga nakasupak sa balaod sa nasud.
Una niini,kusganong gipadumduman ni Moreno ang mga otoridad nga kon mahimo dili mag-resulta sa kamatayon sa suspected drug pushers ang matag-operasyon nga ilang himoon bisan asa dinhi sa rehiyon.
Samtang dili usab uyon si Cagayan de Oro 2nd District Rep Rufus Rodriguez nga ibalik ang original version sa silot-kamatayon sa nasud.
Kini bisan nga gimando ni Duterte sa Kongreso ang pagpabalik niini aron gamiton sa pagsilot sa mga konbiktado sa pagpayuhot sa ilegal nga droga sa nasud.
Miingon si Rodriguez nga may balaodnon na kining napasar apan mag-sentro pagsilot niadtong mga langyaw nga nalambigit sa ilegal nga droga.
Partikular nga gitumbok sa kongresista kadtong kanasuran nga may gipangsilotan sa kamatayon nga mga Pinoy gumikan sa pasangil nga nagpayuhot sa ilegal nga droga.
Samtang nakulangan ang Citizens Watch for Good Governance o CWGG sa unod sa ika-upat nga SONA ni Pres Rodrigo Duterte sa kauluhan.
Si CWGG convenor Atty Antonio Soriano miingon nga balik-balik ra ang unod sa SONA ni Duterte.
Apan bisan niini, gihatagan gihapon sa pasado nga grado ni Soriano si Pres Duterte.
Asoy ni Soriano nga nadismaya siya tungod kay wala lakbiti ni Duterte ang kalambuan sa nagpadayon nga rehabilitasyon sa Marawi City.
