CAGAYAN DE ORO CITY – Wala na tumpangi ni City Mayor Oscar Moreno ang tubag-batikos ni Provincial Gov Bambi Emano kaniya kabahin sa isyu sa travel pass nga gipangayo gikan sa mga residente ning syudad ayha tugtan makasulod sa Misamis Oriental.
Kini human una nga wala magustuhi ni Moreno ang daw paglisod-lisod sa gobernador ilabina ning panahon sa krisis.
Miingon si Moreno nga naka-pokus kini kon unsaon nga dili subli masudlan ang syudad sa coronavirus disease nga dakong bahad sa panglawas sa katawhan.
Samtang bisan si Emano ang nagpugong na usab nga tubayan pa ang paghinaway ni Moreno sa paagi nga gipatuman nila batok coronavirus disease sa lalawigan.
Namahayag si Emano nga gitubag lamang niini ang mga komento sa syudad nga daw nag-kuwestiyon kon nganong kinahangla’g travel pass ang mga residente ayha makasulod sa probinsya.
Sama kang Moreno,likayan na usab sa gobernador ang paglakbit niini samtang pulos sila anaa sa pagbantay nga dili masudlan ang syudad ug lalawigan sa bayrus.
