CAGAYAN DE ORO CITY – Gisaway ni City Mayor Oscar Moreno ang pipila ka paagi ni Provincial Gov Bambi Emano kabahin sa pagpatuman sa hugot nga health security protocols aron dili masudlan sa positibong kaso sa coronavirus ang lalawigan.
Kini human wala magustuhi ni Moreno ang daw paglisud-lisod sa probinsya sa mga biyahidor pinaagi sa pagpakuha’g travel pass ayha tugtan makadalikyat sa ilang dalikyatan.
Miingon si Moreno nga dugang kabug-aton alang sa katawhan ang maong rekisitos nga nalatid sa general community quarantine nga gipatuman ni Emano sa lalawigan.
Dumduman nga mismo si Moreno ang nakig-koordinar kaniadto kang Emano alang sa usa ka unified community quarantine batok bayrus alang sa syudad ug lalawigan.
Samtang giakusahan ni Emano nga gigamit lamang ni Moreno ang COVID-19 pandemic alang sa iyang politikanhon nga interes sa Misamis Oriental.
Miingon si Emano nga nasuya lamang si Moreno kon unsa ka epektibo ang implementasyon sa kuwarantinas aron proteksyonan ang katawhan batok sa bayrus sa lalawigan.
Dugang sa gobernador nga si Moreno ang dili angay molabaw sa doktor ug dili manghilabot sa kalihukan sa lalawigan.
