CAGAYAN DE ORO CITY – Gibulgar ni Cagayan de Oro City Police Office deputy director for administration Lt Col Lemuel Gonda nga walay kooperasyon si City Mayor Oscar Moreno sa rekomendasyon sa task force aron epektibo nga mapaubsan ang pagsaka sa kaso sa COVID-19 sa syudad.
Kini human unang gi-rekomendar sa local task force nga ipatuman ang granular lockdown sa mga brgy nga anaa ang kaso sa COVID-19 delta variant apan wala mo-uyon niini si Moreno.
Kini ang hinungdan nga mihimo sila’g comment report nga gipadala sa Camp Alagar ug Camp Crame aron masayran kon unsa ang tinud-anay nga nahitabo dinhi sa dakbayan.
Samtang gitawag ni Moreno nga ‘unprofessional’ ug angay lamang mo-resign sa pagka-pulis ni Gonda.
Kini ang reaksyon sa mayor nunot sa pagbulgar ni Gonda nga ‘un-cooperative’ ang city govt sa pagsanong sa granular lockdown recommendation sa task force aron epektibong batukan ang presensiya sa delta variant sa COVID-19.
Miingon si Moreno nga posibleng naglaraw na si Gonda pagsulod sa politika rason nga kini mihimo na’g demolition job batok kaniya.
Dugtong niini,giakusahan ni Moreno si Gonda nga nag-imbento lamang sa eksena kabahin sa iyang komento sa pagdumala sa city govt sa pakigbatok sa COVID-19 trasmisison ning syudad.
Miingon si Moreno nga walay pagtugot sa kadagkuan ni Gonda ang giluwatan nga pahayag niini hinungdan angayan mag-resign kini aron dili madamay ang PNP organization.
Gipamugos sa mayor ang panaghap nga gihimo kini ni Gonda kay may plano siya nga mosulod sa politika dinhi sa syudad.
Apan namugos si Gonda nga nasabtan sa kadagkuan sa Police Regional Office 10 ang gipaabot nga report sa Cagayan de Oro City Police Office sa hisgutanan sa kasamtangang kahimtang nga pakigbatok sa virus infections sa COVID-19 sa syudad.
Miingon si Gonda nga sukawhi sa bu-ot ipato-o ni Moreno nga nagbuot-buot lamang kini sa iyang gipanulti sa media interviews sa miaging semana.
Miingon si Gonda nga mabarugan niya ang iyang gipanulti kay nalatid kini sa report nga nakaabot na sa Camp Alagar ug sa ilang national headquarters sa kauluhan.
Dugtong niini,gitambagan ni City Director Col. Aaron Madia si Gonda nga magpukos na lamang sa iyahang trabaho ug dili na mag apil-apil sa komento.
Kini human nanawagan si Moreno nga mo-resign na lamang pagka pulis si Gonda human wala maangayi niini ang komento nga walay kooperasyon ang syudad sa panawagan nga granular lockdown.
Gibutyag ni COCPO spokesperson Major Evan Viñas nga personal nga opinyon lamang ang giluwatan ni Gonda.
Kini ilabina nga may katungod ang matag-usa niini apan kontento na ang COCPO pagsunod sa kung unsa lamang ang mando sa IATF mahitungod sa gihatag nga quarantine level.
