CAGAYAN DE ORO CITY – Dili supak si City Mayor Oscar Moreno nga wad-on ang 4th Infantry Division,Philippine Army nga nakabase sa Camp Edilberto Evangelista ning syudad ug ibalhin sa Bangcasi,Butuan City sa Caraga Region.
Kini bisan kon kusganong gisupak ni Cagayan de Oro 2nd District Rep Rufus Rodriguez ang kagustuhan sa Dept of National Defense nga himoon nang pribado ang pagdumala sa duluna sa yuta nga nakabase ang kampo sa Brgy Patag ning syudad.
Gibutyag ni Moreno nga maayo ang plano sa gobierno sa maong kampo kay tinguha kining e-redevelop sama sa Global City nga makita sa Taguig City sa kauluhan.
Una nang gibutyag ni Rodriguez nga kuyog ang ubang mga kongresista sa rehiyon,mohimo sila sa kusganong pagsupak sa military camp pull out kay dugay na kining naghatag sa lig-ong seguridad sa katawhan dinhi sa dakbayan.
Samtang direktang maapektuhan ang seguridad sa dakbayan kon ihinayon sa national govt ang pagkuha sa 4th ID,Philippine Army aron ipahimutang sa rehiyon sa Caraga.
Kini ang gibuyag ni 4th ID spokesperson Rodulfo Cordero Jr nunot sa subli pagkabuhi sa interes sa gobierno nga mahimong pribadong pagdumala na ang duluna sa yuta sulod sa Camp Evangelista,Brgy Patag ning syudad.
Gibutyag ni Cordero nga hinoon sa kanunay andam sila nga mosanong kon unsa man ang makab-ot nga hukom sa ilang mga kadagkuan kabahin sa kasamtangang kahimtang sa kampo nga dako’g tabang sa seguridad dinhi sa rehiyon
