CAGAYAN DE ORO CITY – Wala gikasakit apan giuyunan ni City Mayor Oscar Moreno ang pagsira ni Gov Jose Maria Zubiri sa Bukidnon aron pugngan ang pagkuyanap sa kagaw nga dala sa coronavirus disease o COVID-19.
Kini human unang gikakurat ug miani sa pagsaway ang gihimo ni Zubiri diin kabahin ang mga residente dinhi sa syudad nga apektado sa kamanduan niini.
Miingon si Moreno nga ensakto ang gibuhat sa gobernador kay tuyo lamang usab niini nga proteksyonan ang ilang katawhan batok sa maong sakit.
Una niini,tinguha ni Moreno nga magbaton sa zero positive case sa COVID-19 ang syudad.
Kini ang rason gihangyo niya si Gov Bambi Emano ug ang lima ka local govt units sa Bukidnon nga duol sa Cagayan de Oro City ug Misamis Oriental nga mopatuman sa unified community quarantine aron panalipdan ang katawhan.
Samtang gipasalig ni Emano nga dili na madugay ug mapaubos na sa unified community quarantine ang Cagayan de Oro City ug Misamiss Oriental.
Kini human hangyu-a ni City Mayor Oscar Moreno ang gobernador nga maghiusa sila nga batukan ang coronavirus disease nga nakasulod na sa Mindanao.
Miingon ang tigpamaba sa kapitolyo probinsyal nga si Carlo Duga-duga nga gihulat na lamang ni Emano ang official report gikan sa iyang technical working group nga nakig-koordinar kang Moreno sa miaging semana.
