CAGAYAN DE ORO CITY – Angayang mas ma-calibrate pa ang aksyon nga ipatuman sa nagkadaiyang ahensiya sa gobierno pagsumpo sa corona virus.
Kini ang pagpasabot ni City Mayor Oscar Moreno samtang wala pa makapalit sa thermal scanners nga magamit sa pag-detect sa tawo nga nagbaton sa sintomas sa maong bayrus.
Miingon si Moreno nga angay lig-on ang lakang ug preparasyon sa matag-local govt units ilabina sa kabarangayan diin nakabase ang mga residente.
Miapelar usab ang mayor sa mga negosyante nga dili mosakay sa panahon aron kalikayan nga makasuhan.
Samtang gi-obligar karon ni Gov Bambi Emano ang taga-Misamis Oriental nga nakauli gikan sa abroad nga boluntaryo mopaubos sa 14 ka adlaw nga hospital isolation.
Kini agi’g pangandam pagpugong nga makakuyanap ang kagaw nga dala sa corona nga naggikan sa Wuhan City,China.
Miingon si Misamis Oriental Provincial Health Office head Dr Jeri Calingasan nga gihimo niya ang rekomendasyon aron mapalig-on ang lakang nga dili makaabot ang maong sakit sa katawhan sa lalawigan ug ilabina dinhi sa syudad.
Gani,bisan ang mga empleyado sa kapitolyo nga naka-abroad ang apil sa mosunod niini.
