CAGAYAN DE ORO CITY – Gipasidan-an ni City Mayor Oscar Moreno ang publiko nga dili pugson ang gobierno nga ipatuman ang bangis nga paghatag proteksyon kanila batok sa coronavirus disease.
Miingon si Moreno nga sundon lamang sa katawhan ang mga gipatuman nga gabayan aron kalikayan nga gamiton sa mga otoridad ang mas hait nga lakang sa pag-disiplina.
Gihimo sa mayor ang pahimangno kay dili niya gusto nga sundon ang paagi sa China nga giipit ang mga tawo masiguro lamang ang kaluwasan batok sa bayrus.
Samtang gisugyot ni Moreno nga ipatuman sa Dept of Health o- DoH-10 ang regional whole approach batok sa coronavirus disease.
Kini human sunod-sunod nang gipaubos sa community quarantine ang Misamis Occidental,Iligan City,Camiguin ug Bukidnon batok sa maong sakit.
Miingon si Moreno kinsa dili uyon sa community quarantine nga angay hiniusa nga lakang ang ipatuman sa rehiyon ilabina nga tuyo niini nga walay bisan usa ka tawo nga makalas gumikan lamang sa maong sakit.
Samtang kasuhan sa kapolisan kadtong mga tawo nga magsupak-supak sa gipatuman nga curfew hours alayon sa pagpugong matakbuyan sa coronavirus disease ang mga nagpuyo sa syudad.
Kini samtang gisugdan na’g patuman sa kapolisan ug ubang ahensiya sa gobierno ang curfew aron mahipos ang mga tawo nga peligro sa bayrus tungod sa kahilayan matag-gabii.
Miingon si City Police Director Col Henry Dampal nga gipangayo nila ang kooperasyon sa katawhan aron magbaton sa zero case sa bayrus ang syudad.
Partikular nga gilusob sa kapolisan ug militar ang Corrales Avenue diin daghang kalingawan ang daw nag-una sa pagsaulog sa semana santa tungod sa sobra kamingaw kagabii.
