CAGAYAN DE ORO CITY – Dili ipamugos ni City Mayor Oscar Moreno ang iyang suhestiyon nga gamiton isip temporary treatment management facility o TTMF ang OWWA-Alubijid Hospital alang sa mild cases sa positibong kaso sa COVID-19 sa lalawigan.
Kini human supaka ni Misamis Oriental Gov Bambi Emano ang maong plano,inay kamulo sila nga pagtukod sa quarantine facility aron may kaugalingon dangpan ang katawhan sa probinsya.
Una nang gipamugos ni Emano nga lisod magamit ang 100-bed capacity OWWA-Alubijid Hospital kay wala makapasar sa standard sa DoH guidelines.
Samtang gihimakak ni DILG 10 regional director Arnel Agabe nga may nadawat sila nga kopya sa resolusyon gikan sa Misamis Oriental diin naghangyo sa regional IATF nga ibalik sila sa general community quarantine status.
Kini bisan kon miingon si Emano nga makaduha na sila nagpadala sa ilang sulat aron sa GCQ status request.
Gibutyag ni Agabe nga maglisod sila paghatag sa aksyon sa hangyo sa probinsya ilabina nga napun-an ang gipangayo nga basehan sa pagpasaka o pagpakanaug sa place status batok COVID-19.
