CAGAYAN DE ORO CITY – Dili uyon si City Mayor Oscar Moreno nga magpalit sa pasiunang kaugalingong mga bakuna ang city govt aron mapadali ang pagbatok sa COVID-19 local transmission sa syudad.
Kini bisan kon may pagtugot niini si vaccine czar Sec Carlito Galvez Jr aron makabaton sa mga bakuna ang local govt units o LGUs kon may kalangan pa ang national govt.
Miingon si Moreno nga angay mag-agad gyud gihapon sa national govt partikular sa sundon nga sistema tungod sa kadako sa trabaho niini.
Gilikayan sa mayor nga maglumba ug inilogay ang matag-LGUs kon kinsa ang makauna paghupot sa mga bakuna alang sa ilang katawhan.
Una nang gisulti ni Galvez nga dili angayang maulahi ang LGUs kon may tsansa nga makabaton sa kaugalingong mga bakuna pangontra sa bayrus.
