CAGAYAN DE ORO CITY – Dili uyon si City Mayor Oscar Moreno nga obligahon ang publiko pagparehistro sa Higalaay app aron mapasayon ang contact tracing sa suspected COVID-19 carriers sa syudad.
Tubag kini sa mayor nunot sa pag-defer sa city council nga citywide nang ipatuman ang ‘quick response’ o QR code sa katawhan ug mga balay-patigayon.
Gibutyag ni Moreno nga walay dautan sa maong tinguha apan dili niya gusto nga limitahan sa gobierno ang katibuk-ang lihok sa katawhan sa syudad.
Samtang suportado ni Moreno ang tinguha ni Pres Rodrigo Duterte nga ipatuman ang nationwide firecrackers ban sa taliabot Pasko ug pagsugat sa Bag-ong tuig.
Kini sa tuyo nga limitahan ang pagpanggawas sa katawhan ug makontrol ang local transmission sa COVID-19.
Gibutyag sa mayor nga mahimong ang local govt unit na lamang ang mogasto sa fireworks display sa maong kasaulugan susama sa gipatuman sa ubang kanasuran.
