CAGAYAN DE ORO CITY – Gihimakak ni City Mayor Oscar Moreno nga palpak ang liderato ni kanhi City Health Office head Dra Lorraine Nery sa pagpakigbatok sa COVID-19 transmission dinhi sa dakbayan.
Kini human unang mikaylap ang mga impormasyon nga napugos pagkanaug sa katungdanan si Nery tungod sa taas nga demanda sa output nga gusto mahitabo ni Moreno.
Miingon si Moreno nga tuyo lamang niini nga dunay reporma ug dad-on sa mas propesyonal ang serbisyo sa CHO hinungdang gidawat niya ang pag-relinquish ni Nery sa katungdanan.
Una nang giangkon sa mayor nga dunay higayon nga dili sila magkasinabot ni Nery ilabina sa mga palisya nga gi-imposar batok COVID-19 sa dakbayan.
