CAGAYAN DE ORO CITY – Nadismaya si City Mayor Oscar Moreno sa giingong pagpasagad sa kapolisan sa pagdasok sa mga indibidwal nga dunay mga kasong kriminal sa nagkadaiyang mini-cells sa syudad.
Kini human natawag ang atensyon ni Moreno sa pagbalibad sa BJMP-10 nga isulod sa Lumbia City Jail ang maong mga dinakpan tungod sa bahad sa local transmission sa COVID-19.
Miingon ang mayor nga gipangitaan unta kini’g paagi daan sa PNP aron dili mahimong problema ang pagpahimutang sa maong mga piniriso samtang dunggon ang ilang mga kaso sa korte.
Samtang giangkon sa Cagayan de Oro City Police Office o COCPO ang dakong kawad-on sa resources aron mapahimutang sa ensakto ang mga binilanggo nga nagpi-ot sa nagkadaiyang selda sa syudad.
Miingon si COCPO representantive Capt Rutherford Ondin nga gidawat nila ang obserbasyon ni City Mayor Oscar Moreno sa maong suliran.
Apan masaligon ang COCPO nga mahatagan sulbad ang kahimtang sa mga binilanggo ning dakbayan.
Dugtong niini,suplayan sa City Health Office o CHO sa facemasks ug bitamina ang mga piniriso nga natanggong sa nagkadaiyang selda sa kapolisan ning syudad.
Kini human nakita ni CHO head Dra Lorraine Nery nga peligro kaayo sa local transmission sa coronavirus ang mga binilanggo.
Partikular nga gibisita sa grupo ni Nery ang mga piniriso nga anaa sa Maharlika Detentio and Rehabilitation Center sa Brgy Carmen ning syudad.
Una niini,,misugyot ang pipila ka police officials nga hangyoon sa city govt ang mga korte nga ipadali ang pagdungog sa mga kaso sa ubang piniriso sa city jail aron masulod na ang bag-ong mga dinakpan sa syudad.
