CAGAYAN DE ORO CITY-Gi-aktibo ni City Mayor Oscar Moreno ang Incident Management Team o IMT aron modugang sa puwersa sa kapolisan ug militar nga mohatag seguridad sa traslacion sa Itom nga Nazareno sa syudad.
Kini gawas sa gipatuman nga liquor ban o pagdili sa ilimnong makahubog ingon man sa pagpugong sa signal sa komunikasyon.
Miingon si Moreno nga tuyo niini nga masiguro paghatag proteksyon sa 300-mil ka deboto nga mouban sa parada
sa Itom nga Nazareno gikan sa San Agustin Cathedral pabalik sa Sr San Jesus Nazareno Parish ning syudad.
Samtang bisan si PNP regional director C/Supt Timoteo Pacleb ang mibati’g kabalaka sa dangatan sa 300-mil ka deboto nga moduyog sa prosesyon sa Itom nga Nazareno sa syudad.
Kini tungod sa pabiling bahad sa seguridad nga posibleng maggikan sa mga terorista.Miingon si Cagayan de Oro City Police Office spokesperson
Police Supt Mardi Hortillosa nga may nakit-an ang Camp Alagar nga pipila ka kakulangon sa security plan rason nga naghimo sila’g adjustment niini.
Gipasalig ni Hortillosa nga anaa na sa 95 porsiento nga andam ang seguridad nga ihatag sa kapolisan,militar ug force multipliers alang sa maong kalihukan.
