CAGAYAN DE ORO CITY-Kasuhan sa Ombudsman sa dugang 18 ka counts sa graft si kanhi gobernador ug karon City Mayor Oscar Moreno didto sa Sandiganbayan.
Kini tungod gihapon sa gisudlan nga transaction ni Moreno ug laing 7 ka miembro sa bids and awards committee o BAC niini nga wala moagi’g public bidding kaniadto sa lalawigan.
Nagtoo ang testigo nga si Engr Antonio Nunez Jr nga napikon na si Ombudsman Conchita Carpio Morales kay sa ilang unom ka gipagawas nga dismissal orders batok kang Moreno,kanunay kini pugngan sa temporary restraining order o TRO gikan sa Court of Appeals o CA Mindanao Station ning syudad.
Samtang ma-isplikar na’g ensakto ni Moreno ang panig niini kabahin sa pasangil nga may kahiwian nga nahitabo sa ilang pag-renta sa heavy equipment gamit ang salapi sa katawhan sa lalawigan sa tuig 2007 ingon man 2011 hangtod 2012.
Kini ang kabahin sa tubag sa kampo ni Moreno nunot sa himoong pagduso’g dugang 18 ka counts sa graft sa Sandiganbayan.
Namahayag ang legal counsel ni Moreno nga si Atty Dale Brian Mordeno nga kini ang ensakto nga higayon na mapasabot sa iyang mga kliyente nga walay sayop sa gisudlang transaction sa maong mga katuigan.
Una nang namugos si Engr Antonio Nunez Jr nga 53 milyones pesos ang katibuk-ang nalugwa nga salapi sa probinsya nga wala miagi sa public bidding ang rental sa mga ekipo.
