CAGAYAN DE ORO CITY – Gikasuhan ni Misamis Oriental tourism consultant Leona Cabagnot si City Mayor Oscar Moreno sa libel sa piskalya sa syudad kagahapong sa hapon.
Kini human akusahi ni Moreno nga si Cabagnot ang babaye nga mitawag sa hotline 8888 aron isumbong ang daw sobra kaluag nga pagpakigbatok sa coronavirus sa dakbayan.
Miingon si Cabagnot nga gipasaka niini ang kasong libelo batok sa mayor tungod sa dakong kaulawon nga nadawat niini ug sa iyang pamilya.
Kusganong gihimakak ni Cabagnot nga siya ang babaye nga gitudlo ni Moreno.
Kini ang rason nga gihagit niini ang mayor nga pamatud-an ang iyang pasangil aron masayran kon kinsa ang nagsulti sa tinood.
Una niini,nakuratan ang katawhan dihang gibulgar ni Moreno nga gikasuhan niya si Provincial Health Office head Dr Jerie Calingasan,Misamis Oriental Tourism Dept head Atty Jeffrey Saclot nga migamit kang Cabagnot aron maghimo’g 8888 complaint drama aron lamang madaot ang iyang pagkatawo.
