CAGAYAN DE ORO CITY – Gitahasan ni City Mayor Oscar Moreno ang mga abogado sa legal department sa city hall nga sugdan na’g imbestigar ang rental contracts sa mga negosyante langyaw nga nag-okupar sa tulo ka dagkong merkado sa syudad.
Kini human subli natawag ang iyang atensyon sa gihimong lakang ni Kag Edgar Cabanlas sa konseho nga angay masusi’g balik ang mga kontra sa mga negosyanteng Intsik nga nag-okupar sa Cogon,Carmen ug Agora nga gitawag nang Market City.
Miingon si Moreno nga tuyo niini masuta kon wala ba’y anomaliya o dili ba disbintaha sa katawhan sa syudad ang existing rental contracts nga pulos natigayon sa liderato ni late former City Mayor Vicente ‘Dongkoy’ Emano.
Samtang uyon ang mga alyado ni Emano nga masusi ang kontrata nga nasudlan ug nahatag nila ngadto sa mga negosyante ning syudad.
Miingon si Atty Leon Gan nga dili nila babagan ang laraw ni Moreno nga i-review ang kontrata sa public markets sa syudad.
Apan giangkon ni Gan nga nahibulong siya kon nganong sa kadugay nga panahon, karon pa kini nahukman ni Moreno.
Nanghinaut si Gan nga walay sagol binuang ang himoon nga pag-susi sa city hall sa mga kontrata nga gihuptan sa negosyanteng mga Intsik.
Miingon si Gan nga kampante ang miaging administrasyon nga maayo ang gisudlan nga kontrata niini sa public markets.
