CAGAYAN DE ORO CITY – Gisupak ni City Mayor Oscar Moreno ang laraw ni Misamis Oriental Gov Bambi Emano nga ipaubos ang Cagayan de Oro ug Misamis Oriental sa Enhanced Community Quarantine o ECQ.Kini tungod sa local transmission sa coronavirus disease sa dakbayan.
Miingon si Moreno miingon nga dili angayang kahadlukan ang COVID 19 local transmission kay nagtoo siya nga adunay solusyon aron kini mapugngan pinaagi sa intensified surveillance.
Dugtong niini, nagtoo ang alkalde nga pamulitika lamang ang gihimo sa gobernador diin gihangyo ang Northern Mindanao Inter Agency Task Force ingon man si Pres Rodrigo Duterte nga ipaubos sa ECQ ang CdeO ug ang Misamis Oriental.
Samtang gitin-aw ni Provincial Task Force COVID-19 spokesperson Atty Jeffrey Saclot nga pagpanalipod lamang sa katawhan ang laraw ni Emano nga ipaubos ang Cagayan de Oro ug Misamis Oriental sa Enhanced Community Quarantine.
Siya miingon nga dako ang posibilidad nga mabutang sa peligro ang kahimtang sa panglawas sa mga Misamisnon kon walay himoon nga aksyon si Emano ilabina nga sulod-gawas ang mga residente gikan sa Cagayan de Oro.
Gitin-aw usab niini nga mahimong walay pulos ang ilang hangyo nga ECQ kon dili apilon ang Cagayan de Oro nga maoy sentro sa lalawigan.
