CAGAYAN DE ORO CITY – Gusto ni City Mayor Oscar Moreno nga pabiling dunay gahom ang mayor sa pag-regulate sa mga mosulod nga negosyo bisan sa krisis nga dala sa coronavirus disease sa syudad.
Kini bisan kon gitahod niini ang pagdili sa Bureau of Internal Revenue o BIR sa mga mayores nga mopalugwa sa business permits ayha maka-operate ang usa ka patigayon.
Namahayag ang mayor nga kon dunay himoong kausaban sa balaod ilabina sa Local Govt Code of the Philippines,kini ang andam niya nga tahuron.
Samtang giklaro ni DILG 10 regional asst director Yvette Tolentino-Sunga wala wad-a sa hingpit ang gahom sa mga mayores molugwa sa business permits ngadto sa mga negosyante nga motukod sa ilang mga patigayon sa syudad.
Miingon si Sunga nga laraw lamang sa BIR nga mapaspas ang pagkolekta’g buhis tungod sa krisis nga nasinatian sa nasud epekto sa COVID-19.
Apan miingon ang opisyal nga nagpabilin ang maong gahom sa mga mayores ug wala hingpit kuha-a sa BIR ngadto kanila.
