CAGAYAN DE ORO CITY – Masaligon si City Mayor Oscar Moreno nga dili molampos ang iyang mga kaatbang sa pulitika nga langkaton siya sa pwesto.
Sumala ni Moreno nga tungod sa daghang kaso nga gipasaka kaniya sa pamilyang Emano, mas milig-on siya nga atubangon ang mga hagit sa iyang pagpanerbisyo.
Gani, kampante siya nga pabilin ang pagsalig kaniya sa mga katawhan sa dakbayan ilabina nga ubay-ubay ka mga proyekto ang iyang nahimo sama sa pagtukod sa daghang mga tunghaan.
Samtang giyam-iran lamang sa legal counsel ni Atok nga si Atty Leon Gan ang akusasyon ni Moreno nga pulitika ang motibo sa pagpasaka’g kaso sa iyang kliyente batok sa alkalde.
Si Gan miingon nga dili bali-balihon sa Office of the Ombudsman ang ilang gipangduso nga kaso kon klaro nga pamulitika ang tumong niini.
Asoy niini nga gipangayoan sa tubag si Moreno sa Ombudsman sa mga kaso nga ilang gipasaka tungod kay may nakita sila nga probable cause.
Gihagit na lamang ni Gan ang alkalde nga tarungon ang ilang counter affidavit aron dili siya malangkat sa puwesto.
