CAGAYAN DE ORO CITY – Naglaum si City Mayor Oscar Moreno nga paboran ang iyang hangyo nga dili na kinahanglanon pa ang travel authority sa pagbiyahe sa syudad paingon sa Misamis Oriental.
Miingon si Moreno nga mapasalamaton siya dihang gidungog sa Regional Inter-Agency Task Force ang iyang obserbasyon ug gipasa na kini sa Northern Mindanao Task Force.
Subling gipamugos niini nga klaro sa gipaggawas nga gabayan sa IATF nga kadto lamang mobiyahe gawas sa probinsya ang nagkinahanglan sa travel authority.
Samtang suportado sa Cagayan de Oro Police Office COCPO ang kagustuhan ni Moreno nga dili na kinahanglan pa ang travel authority sa pagbiyahe sa syudad padulong sa Misamis Oriental.
Apan gitin-aw ni COCPO spokesperson Major Ivan Viñas nga hangtud walay resolusyon o direktiba gikan sa PNP headquarters sa Kampo Crame kalabot na sa hangyo sa alkalde, magpadayon ang ilang pagpangayo sa travel authority.
Naglaum na lamang si Viñas nga mahatagan sa resolusyon ang hangyo ni Moreno tungod kay makabenepisyo usab ang kadaghanan ug dili lang ang kapolisan.
Samtang dili una mahatag sa Police Regional Office 10 ang kagustuhan ni Moreno nga wad-on na ang pagpakuha sa publiko sa travel authority ayha makasulod-gawas sa syudad ug Misamis Oriental.
Kini human nakaabot na sa Inter-Agency Task Force sa kauluhan ang kagustuhan ni Moreno nga ma-exempted ang syudad nga mokuha sa maong pagtugot gikan sa PNP.
Miingon si PRO 10 spokesperson Lt Col Mardi Hortillosa maoy tahas gihatag ni Joint Task Force COVID Shield commander Lt. Gen. Guillermo Eleazar nga dunay hiniusang apelar si Moreno ug Misamis Oriental Gov Bambi Emano nga wala na kinahanglana ang travel pass alang sa ilang mga residente sa dakbayan ug lalawigan.
