CAGAYAN DE ORO CITY-Gisaway ni City Mayor Oscar Moreno ang giingong pagpanghilabot sa pipila ka miembro sa konseho sa internal nga kalihukan sulod sa Cagayan de Oro City Water District o COWD ning syudad.
Kini human unang nagtoo sila Konsehal Bong Lao,Kag Salcedo ingon man City Coun Reuben Daba nga epekto sa gipasaka nila nga kaso batok sa MetroPacific-COWD ang pagtangtang kang Engr Rachel Beja isip manager.
Nagduda na hinoon si Moreno nga ang maong mga konsehal ang nagka-interes sa kontrata tali sa duha ka korporasyon nga kamulong hatag sa water suplay ning syudad.
Una niini,gipanghimakak ni Moreno nga may kalabutan kini sa hukom sa COWD board of directors aron tangtangon si Beja sa pagka-general manager.
Samtang gilayong gi-depensa ni Salcedo kinsa miembro sa public utilities committee sa konseho ang pag-kuwestiyon niini kon nganong gilangkat sa puwesto isip general manager si Beja sa COWD.
Namugos si Salcedo nga katungod ang konseho ug publiko nga masayod sa mga kalihukan sa COWD ilabina ang pagpapha kang Beja.
Miingon si Salcedo kinsa chairman usab sa committee on cooperatives sa konseho nga daw nagbaton sa dakong sala si Beja kay gisipa kini sa puwesto basi sa giingong pagkawala sa trust and confidence.
Samtang nag-abusar sa gahom ang naglangkob sa board of directors diin gipapha nila isip general manager si Beja COWD ning syudad.
Miingon si Lao,chairman sa komitiba sa public utilities sa konseho nga protektado sa balaod sa Civil Service Commission si Beja hinungdan nga dili makiangayon ang gihimo sa board of directors.
Kini ang hinungdan nga mohimo’g public hearing ang konseho diin ipatawag niini si Beja ingon man ang board of directors.
Kabahin sa mga board of directors sa COWD sila si Eduardo Roa Montalvan isip chairman;Atty Mateo G.Delengencia nga vice chairman;Soc Antonio del M.Rosario isip secretary;Dr Hilly Roa Quiaoit nga asst secretary ug member Concepcion Roa Quiblat.
