CAGAYAN DE ORO CITY – Molugwa sa laing executive order si City Mayor Oscar Moreno kabahin sa kampanya kontra kuyapa nga African Swine Fever o ASF sa syudad.Kini human tulo ka brgy sa syudad ang nasudlan sa ASF diin ulahi niin ang Baikingon ning semanaha lamang.
Gibutyag ni Moreno nga mihimo na usab sa laing culling operation ang incident management team sa mga baboy nga nakasulod sa 500 meter radius gikan sa ground zero nga nagsumikad ang pagpositibo sa ASF.
Una nang gibutyag sa IMT nga anaa sa sobra libo ka baboy ang napatay tungod sa ASF sa syudad.
Samtang mitala na usab sa dul-an libo ka baboy ang napatay tungod sa ASF sa Misamis Oriental.
Kini human kompirmaha ni Gov Bambi Emano nga nakasulod na ang ASF sa lungsod sa Laguindingan ning lalawigan.
Nabalaka ang gobernador nga mokuyapan pa sa laing kalungsuran ang ASF nga dako’g epekto sa panginabuhian sa katawhan sa lalawigan.
Gibutyag sa gobernador nga pasiunang 43 ka baboy ang napaubos sa ‘culling’ tungod sa hadla sa impeksyon.
Una nang apektado ang 224 ka magba-baboy sa lungsod sa Initao ug Manticao dihang naigo usab sa ASF ang 805 ka mga binuhi niini sa miaging semana.
Dugtong niini,mipatuman sa hugot nga mga lakang ang lokal nga kagamhanan batok pagkasudli sa African Swine Fever o ASF sa Brgy Kibaghot,Laguindingan,Misamis Oriental.
Gibutyag ni Laguindingan Mayor Diosdado Obsioma nga ila nang gikordon ang lugar aron mapungan ang pagkaylap sa ASF padulong sa ubang barangay sa iyang lungsod.
Namahayag ang mayor nga nagpadayon usab ang gihimong profiling sa mga nagbuhig baboy alang sa itunol nga compensation nga ihatag ngadto sa mga apektadong magba-baboy sa ilang lugar.
